នំចាក់ចាន់

គ្រឿងផ្សំ ៖

- ម្សៅឆា ១វែក

- ម្សៅខ្សាយ កន្លះវែក

- ទឹក ១វែក

- ស្ករ ១វែក

- អំបិលចុងស្លាបព្រាកាហ្វេ

- ខ្ទិះដូង ១វែក

- ទឹកពូតពីស្លឹកតើយបុក កន្លះវែក ឬ ដាក់ទឹកល័ក្កសម្រាប់ធ្វើនំ ក៏បាន ដើម្បីបំបែកព័ណ អោយបានច្រើនមុខ៕

របៀបផ្សំ៖

១- យកទឹកសុទ្ធ ដាំអោយពុះ ដាក់ស្ករ និង អំបិលចូល អោយរលាយ ហើយលើកចុះទុកអោយត្រជាក់ឧណ្ហៗ

២- យកម្សៅឆា និង ម្សៅខ្សាយច្របល់លាយគ្នា រួចចាក់ទឹកស្ករចូល បន្ទាប់មក ចាក់ទឹកស្លឹកតើយពូត ចូលរួច កូរម្សៅ អោយរលាយម៉ដ្ឋសាច់ចូលគ្នា។

៣- ចាក់ម្សៅកូរ ចូលក្នុងចានរាប សម្រាប់ចំហុយ លៃអោយរាបស្មើ ហើយស្តើង។ លុះចំហុយឆ្អិនហើយ លើកចេញ យកខ្ទិះដូងលាបពីផ្ទៃខាងលើ ទុកអោយត្រជាក់បន្តិច ទើបចាក់ម្សៅឆៅ ជាន់ទីពីរ រួចដាក់ចំហុយអោយឆ្អិន។ បន្ទាប់មក យើងលើកចេញ យកមកលាបខ្ទិះដូង ទុកអោយត្រជាក់បន្តិច ទើបចាក់ជាន់ទី៣។ យើងធ្វើបែបនេះ រហូតដល់ ៧ ឬ ៨ជាន់។

៤- បើចង់បានពណ៌ប្លែកៗ សូមដាក់ទឹកស៊ីរ៉ូ ឬ ដាក់ល័ក្កសម្រាប់ធ្វើនំ ជំនួសទឹកស្លឹកតើយពូត។

៥- នៅពេលឆ្អិនគ្រប់ជាន់ហើយ យើងលើកចេញពីចង្រ្កាន ទុកអោយត្រជាក់ ទើបកាត់ជាបន្ទះវែង រួចបត់ធ្វើជារាងផ្កាកុលាប។

៦- បើមិនចង់ធ្វើជាផ្កាកុលាបទេ យើងអាចកាត់នំជាដុំបួនជ្រុង យកទទួលទាន តាមចំណូលចិត្ត។