ស៊ុប​អន្ទង់​

+ គ្រឿងផ្សំ​ ៖

·         អន្ទង់​៣​ខាំ​ច្បុ​ត​យក​រំអិល​ចេញ​ជាមួយ​ចំបើង ឬ​អង្កាម ឬ​ស្លឹក​ននោង​លាយ​ផេះ​រួច​លាង​ទឹក​វា​ឲ្យ ស្អាត​កាត់កង់ៗ​ប្រវែង​២​ថ្នាំងដៃ ។​

·          ត្រ​យ៉ូ​ង​ចេក ១​បង​ស្រទាប់​ចាស់ៗ​ចេញ​ឲ្យ​អស់​រួច​ពុះ​វា​ជា ២ សឹម​កាត់​វា​កង់ៗ​ដូច​ស្ងោរ ។​

·         គល់​ស្លឹកគ្រៃ ២​គល់ កាត់​វា​បញ្ឆិតៗ​ស្ដើងៗ ប្រវែង ២​ថ្នាំងដៃ ។​

·         រំដេង​ចិត​ស្ដើងៗ ៤​បន្ទះ​

·         ស្លឹក​ក្រូចសើច ៣​សន្លឹក​

·         ខ្ញី​ចិត​បន្ទះ​ស្ដើងៗ ៣​បន្ទះ​

·         ហេ​ប៊ី យី​ហ៊ឺ កន្លះ​ខាំ​

·         ទឹកដោះគោឆៅ​រូប​ខ្លាឃ្មុំ ១​កំប៉ុង​ដែក​ខ្លី​

·         ទឹកកក​ដុំ​ដំ​ឲ្យ​ម៉ត់ កន្លះ​គីឡូ​

·         ជី​វ៉ាន់ស៊ុយ តិចតួច​

·         ជីរ​ណា តិចតួច​

·         បន្លែ​ភ្លៅកង្កែប ឬ​ត្រកួន ១​ខា កាត់​ខ្លីៗ​ប្រវែង​មួយ​ថ្នាំងដៃ​

·         ខ្ទឹមស​ចិញ្ច្រាំ ១​ស្លាបព្រា​បាយ​

·         ទឹកត្រី ១​ស្លាបព្រា​បាយ​

·         ស្ករស កន្លះ​ស្លាបព្រា​កាហ្វេ​

·         ម្សៅ​ស៊ុប​រ៉​ត​ឌី ឬ​ខ្នរ​មួយ​ចឹប​

·         ប្រេងឆា ៣​ស្លាបព្រា​បាយ​

·         នំ​បញ្ចុក កន្លះ​គីឡូ​

·         ប្រើ​ទឹកជ្រលក់​ទឹកត្រី​កោះកុង ឬ​ទឹក​តៅហ៊ូ​

+ វិធី​ធ្វើ​ ៖

·         ដាំ​ឆ្នាំង​ឲ្យ​ក្ដៅ ដាក់​ប្រេងឆា ខ្ទឹមស​ចិញ្ច្រាំ ស្លឹក​ក្រូចសើច គល់​ស្លឹកគ្រៃ រំដេង ខ្ញី លីង​ពួកវា​ចូល គ្នា​ឲ្យ​ឈ្ងុយ​សឹម​ដាក់​ត្រ​យ៉ូ​ង​ចេក ហៃ​ប៊ី យី​ហ៊ឺ រួច​ដាក់​ទឹកកក​ចូល ។​

·         ពេល​ទឹកកក​រលាយ​យើង​ទុក​ឲ្យ​វា​ពុះ​សឹម​ដាក់​ទឹកត្រី ស្ករស ម្សៅ​ស៊ុប​ខ្នរ ឬ​រ៉​ត​ឌី ភ្លក្សមើល ល្មម​ចូលចិត្ត​សឹម​បង់​អន្ទង់​ចូល រង់ចាំ​វា​មួយ​រំពុះ​សឹម​បន្ថយ​ភ្លើង​ឲ្យ​វា​ឆេះ​ខ្សោយៗ ។​

·         បន្ទាប់​មកចាក់​ទឹកដោះ​គោ​ឆៅ បន្លែ​ភ្លៅកង្កែប ឬ​ត្រកួន ជីរ​ណា ជី​វ៉ាន់ស៊ុយ ចូល​ព្រម​គ្នា ។​

·         ទទួលទាន​ស៊ុប​អន្ទង់​ជាមួយ​នំ​បញ្ចុក ជ្រលក់​ទឹកត្រី​កោះកុង ឬ​ទឹក​តៅហ៊ូ ឬ​ទឹកត្រី​អំពិល​ទុំ ក៏បាន​តាម​ចំណូលចិត្ត ៕